Wednesday, December 1, 2021
Home Uncategorized COVID-19: Ababyeyi, abarezi n’ubuyobozi mu ihurizo ryo kugarura abana mu murongo w’ishuri

COVID-19: Ababyeyi, abarezi n’ubuyobozi mu ihurizo ryo kugarura abana mu murongo w’ishuri

Bamwe babyeyi bafite impungenge  z’imyigire  y’abana  bagiye gusubira ku mashuri bari bamaze igihe batiga kubera icyorezo cya covid-19.

Bamwe bataye ikinyabupfura, abandi batewe inda. Hari n’abamaze kwinjira mu bucuruzi , abandi bashatse imirimo  itandukanye harimo n’abagiye gusaba akazi  k’ubuyede ku nyubako  zitandukanye harimo n’iz’amashuri .Abo bose bafashye imyitwarire idasanzwe ku buryo bisaba kuba maso kugira ngo bafashwe kongera kwiyumva nk’abanyeshuri.

Mukabaranga Belancille umwe mu babyeyi  bo mu karere ka Huye avuga ko kubera igihe kinini abana bamaze batari mu ishuri uburere bwabo bwahindutse. Bamwe babaye  nk’abigenga  bigira mu mirimo itandukanye,  akaba afite impungenge ko bizagorana cyane igihe  bazaba bageze mu mashuri.

Yagize ati ’’Ndamufite  w’umuhungu, yiguriye amatungo  ye yirirwa ayashakira ubwatsi, numva avuga ko atazasubira ku ishuri ko yahisemo korora. Ubu nyine ndabyiteguye ko  nzahangana na we  ngo arisubiremo ariko si na we wenyine, abana barataraye hirya no hino bashaka amafaranga  sinzi ko imyigire yabo  izashoboka.Yewe n’ikinyabupfura na cyo  kizagorana; ubu babaye  nk’abantu bo hanze basanzwe, kuko amashuri na yo burya yarabafataga,  agatuma  nta bindi bibarangaza’’.

Uyu mubyeyi kandi akomeza agira ati ’’erega  ntitunirengagize n’abakobwa batewe inda  ubu se baziga bate? Abana birirwa  bakungikanye  bazerera  uretse n’abigiriye  mu mirimo n’abasigaranye n’ababyeyi bababona bwije batashye”.

Inezayimana Shela w’imyaka 18  yiga mu mwaka  wa 6 w’amashuri yisumbuye ni umwe mu banyeshuri  batatu, bagiye gushaka akazi k’ubuyede  ku  nyubako imwe y’amashuri iri mu murenge wa Mukura mu karere ka Huye.

Avuga ko ubusanzwe  yajyaga  afatanya na  nyina mu kazi k’ubucuruzi  asanzwe akora. Nyuma yo kubona ko abandi bana  bagiye gukorera amafaranga na we yahise ajya gusaba akazi, ubu ahembwa amafaranga 1500 ku munsi.

Icyakora ngo amashuri nafungura azasubira kwiga cyane ko yari arimo kuyarangiza gusa avuga ko hari bagenzi be  ajya yumva ko batazarisubiramo .

Ati “Hari abamaze kuryoherwa n’amafaranga tujya tuganira bamwe bagiye i Kigali bavuga ko rwose batazarigarukamo  nk’abari bakiri hasi  mu wa kane, mu wa 3 twavugana bakakubwira  ati ubwo nabonye aho nkorera amafaranga  kandi nkaba nanayabona ntabyo gusubirayo’’.

Inzego  z’ubuyobozi  zifite  icyo zibivugaho

Mu karere  ka Muhanga  na ho  hari abana bagiye gusaba imirimo  hirya no hino. Kayitare Jacqueline umuyobozi  w’aka Karere  avuga  ko  abayobozi  n’ababyeyi  bafite inshingano y’uko abana bose bagejeje igihe cyo kwiga bagomba kujya mu ishuri, bityo ngo ntibazemerera  ababyeyi bazatuma abana batajya kwiga kuko bose barazwi.

Ati ’’Ntidushobora kuzemera ko abana batajya kwiga ngo bagiye gushaka amafaranga. Ni inshingano yacu ubuyobozi n’ababyeyi  ko abana biga, twatangiye gutegura ababyeyi ahubwo  ngo bategure abana haba mu mutwe no ku bikoresho ko bagiye gusubira kwiga, ubu se batagiyeyo aya mashuri turimo kubaka yaba azamara iki kandi turimo kuyubaka ngo abana babone aho bigira?’’.

Kayitesi  Alice, Guverineri w’intara y’Amajyepfo  avuga ko  abana bagiye mu mirimo itemewe ababakoresha bazabihanirwa ariko  nk’abahawe ibiraka  ku mashuri  yubakwa bitavunanye, ubu nk’intara bafashe ingamba  n’ubukangurambaga  bwibutsa abana ko igihe cyo kwiga  cyageze.

Ati “Tugiye kwifashisha  ubukangurambaga  haba mu nsengero zafunguwe,ku masoko  ,mu masibo n’imidugudu hifashishijwe indangururamajwi (megaphones) zigenda zizenguruka zibutsa abana ko igihe cyo kwiga cyageze ,dukurikije  imbaraga tuzakoresha turumva tutazagiramo icyuho’’.

Ikibazo mu mboni y’impuguke

Ntawigenera  Narcisse impuguke  mu birebana  n’ubuzima bwo  mu mutwe  n’imitekerereze  ya muntu, avuga  ko  uruhare  runini  rw’imyitwarire y’abana  n’ikinyabupfura ku mashuri rufitwe  n’abarimu. Kuri  we  ngo aba barezi  ni bo  bakwiye  gufashwa  bagasobanukirwa  uburyo bakwiye kwakiramo  abana   bakabagarura mu mwanya w’amasomo.

Agira ati “Muri  iki gihe abana  bari bamaze bicaye mu ngo hari uwagiye gushaka akazi  aho bubaka akahahurira na mwarimu na we agasaba, basangira  ubuzima  bwa buri munsi ya ntera yari iri hagati ye na mwarimu  yaragabanutse. Ahubwo abarimu  hari abashobora kwinjira mu kazi  bafite ipfunwe  bati uyu mwana wambonye meze  gutya  nzamwigisha nte ?”

Ngo aba rero ni bo bakwiye gufashwa  bakamenya  uburyo bazakira imyitwarire  y’abana bavuye mu rugo  kandi bari bamaze igihe batiga

Inama y’abaminisitiri  yateranye  ku wa 25 nzeri  ,2020 yemeje ko amashuri  azatangira  mu kwezi kwa 10 hakabanza  amashuri makuru na za kaminuza, ayisumbuye n’abanza  bikazagenda  bifungura buhoro buhoro.

Nk’uko  bigaragara  ku ngengabihe  ya Minisiteri y’uburezi tariki ya 2 Ugushyingo  hazatangira abanyeshuri bo mu mwaka wa 5 n’uwa 6 w’amashuri  abanza, n’umwaka wa 3 n’uwa 5 w’amashuri y’imyuga,  n’umwaka wa mbere kugeza mu wa 3 w’inderabarezi rusange.

Minisiteri y’Uburezi iherutse gusaba ibigo by’amahuri byari byateganyije gupima abana b’abakobwa ngo barebe ko batwite kubireka.

Uwambayinema  Marie Jeanne

LEAVE A REPLY

Please enter your comment!
Please enter your name here

- Advertisment -

AMAKURU AGEZWEHO

Kutagira amakuru ahagije ku ndwara zandurira mu mibonano mpuzabitsina bituma batabisobanurira abana babo

Mutungirehe Samuel Hari ababyeyi batandukanye bavuga ko usibye kumenya ko hari indwara zandurira mu mibonano mpuzabitsinda nta bundi bumenyi...

Abagore baracyahohoterwa bakimwa ijambo ku mutungo

Mutungirehe Samuel Muzigabanga, umubyeyi twahinduriye amazina ye kubera impamvu zo gutangaza ihohoterwa akorerwa n’umugabo we bashakanye, ukomoka mu Murenge...

Bahitamo gukoresha udutambaro mu gihe cy’imihango kuko batabasha kugura cotex

Mutungirehe Samuel Bamwe mu bakobwa n’abagore bavuga ko batabasha kwigondera impapuro z’isuku zikoreshwa mu gihe cy’imihango zizwi nka Cotex...

Bamwe mu bagore birirwa mu rugo bahomba amakuru kubera kutagira smart phone

Mutungirehe Samuel                               Bamwe mu bagore bo mu Mujyi wa Kigali no hirya no hino mu Turere bavuga ko batabasha...

INKURU ZIKUNZWE

Street mothers: Coping with motherhood amid COVID-19 pandemic

Marie Anne Dushimimana Street mothers do not have a roof over their heads and hardly can they cook for...

Uburyo bwiza bwo kugabanya umubyibuho Ukabije

Marie Anne Dushimimana Ihirwe Bertrand ku myaka 8 yari amaze kugira ibiro 40, atabasha kugenda n’amaguru ahantu kure ubwo...

Kicukiro: Ikigo gihugura abagore kirasaba ubufasha bwo guhangana n’ingaruka za covid-19

Marie Anne Dushimimana Claudine Ingabire w’imyaka 22 ukomoka mu Murenge wa Kigarama mu Karere ka Kicukiro yatwaye inda ubwo...

Teenage Pregnancies: Some victims cover perpetrators

Nyiraneza (not her real name), a pregnant teenager from Karongi District, says she had been impregnated by a man, after giving her...

IBITEKEREZO